بالسلامة عليك ياعقلي
ارحل فين بغيتي
غير بغي ترحل
قطع سلاسل الغير
غير كن راجل
لا حد يهمك
ياك همك تجول
وسيح ف حكامك
قرا ما قالت الشتا للتراب
ما قالت الريح للبحر
قرا حديث الزهر
مع افراق النحل
وطلق وذنك
ياك تجيك خبيرت النمل
ملي اضحك على اللي ضحك ف الرخى
واشكى منين تزير عليه الشغل
وسال اذا غاب عليك ما عرفتي
فتش الي عرفتي
غير اللي جهلتي
وسير ف هبالك
هبل ف عقلك ياكما تلقى راحتك
…ياك اللي لقى الرحاة ف لهبال
آش يدير بلعقل….
ازعم ف خطواتك
شعل فنارك غول يسرط ظلامك
وسوط عليه ياك يكون سحابة صيف
يقشع شعاك ف عين سرابك
وتبان المعنى ثاني ف سؤال
يعجبك منو كيف نسيتيه
وهو على بالك
بالسلامة عليك آعقلي
ها انا حررتك
من شوفتي لي وسط الناس
غير دير الطايلة وارحل
سوارت الممنوع خذها
وها البيبان اذا قدرتي تحلها
وادخل
انسى حكامي عليك
ونسيني ف حكامك
سير عكسي
يمكن توصل
في نسيتي توصل
وسرح الطريق لمسجونك
لا تبقى عقبة ف طريقي
لا نبقى ف طريقك جبل
مسجونك حيث نقرا سر الكون
مسجوني حيث تشوف
بعين الناس
اللي هما ما شفوهش
وحتى لين على هذ الحال
لا انت حر ف عقلك
لا انا تحررت من لعقال
بزز نفلت منك
بزز يقيسك مني لهبال
طلقني نمشي كيف بغا هوايا
ونسى تعقلني
الى مسني منك لهبال
بغيت نفوت الحد اللي رسمتيه لي
بغيت ف هبالك نديع ف هذ الكون
ياك تكون مني الكاينة
ياك نسوى حبة الرمل
ف هذ الكون
نكون واحد موحد
ماشي جوج كوان
كيف نفكر نكون
وكيف نكون نفكر
نكون مراية روحي
تكون روحي مرايتي
يمكن لقدام نزيد
وبالسلامة عليك آعقلي
طلقني نعيش
وعيش كيف بغيتي
ياك يكون لي وليك
